شنهو الوطن

يسألني ابني البجر شنهو الوطن يابا
كلت الوطن يابني أمك واخوك وترابك
هو المضى واليوم والجاي من عمرك
وهو حليب رضعت وهو معاني كتابك
هو البرد هو الدفو هو الشمس والكمر
وهو حضن ترتاح بيه وترميله اتعابك
الوطن دودحانة طفل وعاجة زغيرونة
الوطن ذكرى أمس انت وجميع صحابك
الوطن حارة ودرب وكل مدرسة و بيت
وكل ميذنة وناقوس للدين وبيبانها ابوابك
الوطن لحظة فرح ساعة حزن كومة علم
لمة زلم كهوة وحطب وتسولف بأمجادك
وبلحظة من الزمن يابني صرنا نهل الدمع
ضاع الوطن يابني وضاعت جميع احبابك
بس انت بيك الامل كله ودرب العشك امشيه
دور عليه زين والكاه وبقلبك تحطه واهدابك
بس لبسه ثوب جديد وعمره وثمره على كيفك
خل كل الخلك تفرح بيه ابنك وربعك واجدادك
عبيه علم ومحبة وعشق واخلاق سمحة النوب
وازرع غصن زيتون بكل كتر و بيها تتبارك
هذا هو الوطن يابني أوصيك بيه أمانة بيدك
حافظ عليه من الاذى ترى هو دمك وشريانك